Main Aisa Kyun Hoon

Main aisa kyun hoon, thoda alag sa hoon

Jaisa bhi hoon, main aisa kyun hoon

Main bol nahi pata, meri zarooratein bata nahi pata

Apki nazron se nazrein mila nahi pata

Aap kahenge kitna nasamajh hai, lekin aisa nahi ki main kuch samajh hi nahi pata

Bheed mein kabhi main ghabra jata hoon, Shor se kabhi mein pareshan hota hoon

Kabhi apne kaan band kar leta hoon, To kabhi apne haath jhatak deta hoon

Aap kahenge kitna ajeeb hoon, lekin main to sirf khud ko isi tarah sambhal leta hoon

Kabhi bhook lage to ro deta hoon, kabhi neend aye to bhi rota hoon

Kabhi pareshan hota hoon to khud ko chot bhi pahuchata hoon

Aap kahenge bada chidchida hoon, kya karoon shabdon mein bata jo nahi pata hoon

Kabhi khush hota hoon, to nachta hoon, kudta hoon, bhagta hoon, daudta hoon

Zor se hasta hoon, gaata hoon, udham machata hoon

Aap kahenge bacha hoon, par aisa nahi ki main bada hona nahi chahta hoon

Aap puchte hai ki samasya kya hai, bimari hai to upchar kya hai

Maa samjhati hai “austim” hai, bimari nahi yeh to “condition” hai

Aap ko pareshan dekh kar, maa keh deti hai, yeh to special hai

Main sochta hoon aisa kya khaas hai, thoda bahut to aap jaisa hi hai

Kabhi dekhiya meri nazar se, main kitni koshish karta hoon aap jaisa hone ki

Apki duniya mein, meri ek duniya banane ki,

Kabhi aap bhi koshish kijiye mujhe samjhne ki

Main aisa kyun hoon, thoda alag sa hoon

Jaisa bhi hoon, main aisa kyun hoon

Recent Posts